(وش أكتب والقصايد صايمه والمفردات صيام)
وش أكتب يالقصيد اللي جزع من فُرقة أحبابي
وش أكتب والخساره مايوصّفها حبر وأقلام
وش أكتب والحزن ينقش مواعيده على بابي
وش أكتب ياعيونٍ من سهرها طرفها مانام
تذارف بالدموع وكن جوف القلب نهّابي
رحمك الله ياأمير رحيله يشبه الأحلام
رحمك الله ياأمير بعْده العيش ماطابي
رحمك الله ياأمير ذخرته للزمان حزام
حزامي كل ماشفت الزمن كشّر بالأنيابي
رحمك الله ياامير الخلوق الصابر المقدام
رحمك الله يالكفّ الندي حتى للأجنابي
رحمك الله يالقلب الحنون مواصل الارحام
رحمك الله ياتاج الشيوخ وتاج الأنسابي
من اللي مثل أبو فيصل لاطقّ الخشوم عرام
نهض للمعضلات وحلّها حلال الأنشابي
من اللي مثل ابو فيصل لاضاق الفقير وهام
من اللي مثل أبو فيصل للمعروف كسّابي
من اللي مثل ابو فيصل لاضاقت على المنضام
كريم ليا عطا وليا سطا ماهو بهيّابي
حشى لله مامثله وحنا من بعْده أيتام
اسرنا في وفاه وخصّنا من بين الأقرابي
حشى لله مامثله يسير ولو تسير اقدام
حشى لله مانلقى العوض فى اقراب وأغرابي
ألا ياعين جودي وأسكبي والدمع ماينلام
ولا تنلام عينٍ دمّها مابين الأهدابي
الا ياعين هليّ مابكينا الا رجال عظام
صعقنا موتهم يالايمي تبلاك الأسبابي
رحمك الله رحمه واسعه مادارت الأيام
رحمك الله ماهل السحاب وسالت أشعابي
رحمك الله ياراع الوفا ماهبّت الانسام
رحمك الله رحمه مالها عدّاد وحسابي
إلهي نقّه من الذنب والأدران والآثام
وونس وحشته وإرسل لقبره نور وأطيابي
إلهي نعّمه في جنتك ياوالي الأنعام
وجاوربه محمد سيّدي وآله والأصحابي