مستقبل الفتاة السعوديه

نحمد الله سوف تجتمع دول مجلس التعاون

لضم الاردن والمغرب وربما سوريا وياريت يعدون على لبنان يكملون الباقى

ماشاء الله تبارك الله

بس بعد ما يكون الفتيات المغربيات واللبنانيات والسوريات

الزوجه السعوديه وين نوديها اكيد راح نصدرها للخارج بمهنة خادمه او مربيه منزليه او طباخه

اقل شى راح تكون محترفه منزليه

عفوا احبتى ان موضوعى ليس للضحك

وانما انى انزف دما وقهرا على عدم تقدير الفتاة السعوديه بحقوقها وحقوق ابناءها

والسخريه بزيادة عددل دول مجلس التعاون

ان كل ريال يدفع خارج الوطن حرام

خيرنا المفروض لابناءنا

وليس تبرعات ومصاريف للغير

لا تجوز الصدقه واهل بيتك فى حاجه لها

مافعلته قرارات حافز من وجود وظائف للسعوديه

هو تكملة لاهانتها
واهانة شرفها

وظيفه تجدها الفتاة تداوم من الساعه الثالثه

حتى الثانيه عشره ليلا

هل هذا ترضاه الدوله لبناتها

ام هو تطفيش لهم من اجل لا يطلبو وظائف

نداء لك يابو متعب

بناتنا بناتك

وهن امانة فى عنقك

وخير ديارنا لا بناءنا وليس للغريب

وسلامتكم

كلام صائب وفي صميم
وكل ماتفضلت بيه هنا سيدي بست قرين صحيح سلمت ولاهنت على الكلام
من متى عندنا البنات صارؤ يتظفون بالاسواق واختلاطهم مع الرجال الاجانب
انا شوفتهم بعيونى بنات سعوديات في سن الزهور موظفات في محلات والمسئول او المراقب عليهم رجال
ويقفل عليهم وسط المحل الدرجه هذي الناس ماعاد تخاف على شرفها وصارت الشغله عادى عندهم
الله الغني عن الشي هذا كله

صادق يابست قرين بس وش نقول حكم القوى على الضعيف

ورى مايضمون العالم كله بعد

وش بقي بالله!!!

المغرب باخر الدنيا وبيضمونها!!!

غير الميزانيه اللي وش كبرها ويوزعونها صدقات على الدول واهل السعوديه بفقر

%80 من الشعب السعودي لايملك بيت ملك بس على الاجار

والاجارات صارت نااااار مولعه بـ 30 الف بالسنه

%80 مو قليل


لكن لاحياة لمن تنادي

لا ويبووون بنات الوطن يشتغلن

القصيبي كان يبغاهن يصيرن خادمات بس عشان يحل مشكلة البطاله

وبناتهم مايرضون عليهن الذل والاهانه

يبغون يبعدونهن عن مهنتهن الاصليه اللي هي تربية الاجيال ويضعونهن بمهن ليست مهنتهن

المفروووض يعطونهن رواتب على تربية الاجيال ليخرج جيل سليم وليس جيل تربية الشغالات

الأم مدرسةٌ اذا اعددتها اعددت شعباً طيب الأعراقِ

الخطاء من الاثنين جميعهم مخطئين سواء اللي يطالب بالتوظيف بهالطريقه والخطأ الاكبر يقع على الاهل لقبولهم لتوظيف بناتهم وخروجهم لوقت متاخر
اذا الوظيفه كذا المفروض الاب والزوج ووولي الامر مايسمح بهالشي ويكون هو اللي يسعى لتوفير الرعايه والمصروف لاهله
وبصراحه اغلب اللي يتوظفون مو محتاجين بس مجرد تمضية وقت ويقولون طفشنا من البيت وبعض الوظائف مثل اللي بالسوق ماتنفعها بشي ولاتزيد من مهاراتها وخبرتها بالعكس تنقص من شانها .. وهم من فئه اللي يرغبون ومؤيدين المراه تعتمد على نفسها وانها مو بحاجة الرجل
وانها خلاص سارت مؤهله لنفس اعمال الرجال وقادره تكافح وكل هذا الكلام مخالف لطبيعة الانثى ودام الموضوع تطور بهالشكل الله يستر الجاي اعظم
لان الامور تكبر وتتغير بشكل كبير والمشكله الناس ماعندها مانع وتتقبل كل تغير حتى لو مخالف للشرع وفيه خطوره على بناتهم
يااليت فيه اولياء امور كثير مثلك يابست كان الدنيا بخير وكان كل مرأه سعوديه لازالت متمسكه بشرفها ودينها ولاراح تمشي مع التيار المدمر
لكن مانملك الا الدعااااااااااااء بان يحمي الله نساء وبنات المسلمين من كل الفتن ..

^

لا ياحبيبتي ياشادن الاغلب محتاجين الوظائف

ولاتنسين ان اغلب البنات الآن عوانس ومحتاجات جداً للوظائف لأن اغلب اولياء الامور مايصرفون على بناتهم

ولاتنسين الآن زادت متطلبات العصر واصبحت الكماليات الآن ضروريات

والسلع الغذائيه زادت اسعارها ولا وجود لحماية المستهلك

وحتى المتزوجات الآن معظم ازواجهن لايصرفون

وان صرفوا غالباً للضروريات وليس للكماليات<<<ماتعرفي الرجل السعودي!!!

وكثير من المتزوجات محتاجات والاغلب اجارات وزوجها يادوب يجمع لاجار البيت والكهرباء ووووووو .... الخ

واصلا اكثر الرجال عندنا مايصرف ولا يسمح لها بالوظيفه شفتي التناقض؟؟؟؟

عجزت افهم كائن الرجل الغريب

يا شادن اذا انتي مو محتاجه غيرك محتاج للوظايف

وانا الحمدلله ما اتكلم عن نفسي لاني الحمدلله مو محتاجه للوظيفه لكن غيري يحتاجها ولا يقدر على العيش من دونها

حسي بغيرك ياشادن


تحيتي

اهلاً فيك حروف ..
احترم وجهة نظرك وعلى راسي والله ..
وانا حاسه بكل امراه لكن اشوف من وجهة نظري البنت مو بحاجه دامها عند ابوها او اخوها
لكن المراه المطلقه والارمله هي من تحتاج لمن يوفر لها وظيفه محترمه وتقدر توفر لابنائها ولنفسها متطلبات حياتهم بسهوله
وتقدر تخرج وترجع للبيت وهي مطمئنه عليهم لكن الوظائف اللي منتشره الان ومالها سنع والاقبال عليها بكثره هو اللي انا اقصده
يعني وحده تشتغل بمحل ملابس بالسوق بالله ايش يجبرها وانتي ياحروف يمكن شفتي بعينك هالشي بصراحه مااظن فيه حاجه تجبرها تتوظف وبالذات اذا كانت لسى صغيره بعمرها
شوفي افضل مهنه للمراه هي التعليم وتلاحظين ماعاد فيه تعيين مثل اول يعني تعجز المعلمه وهي على كرسيها وفيه بنات كثيييييييييير خريجات ومااحد عينهم ولاجل تحلل سنين اللي قضتها بالعلم تقول بدل مااجلس اروح اعمل اي شي بس المهم اكسب لو القليل وانا اتكلم فقط عن الشريحه من الناس اللي حالهم ميسور وليسوا اغنياء بل عندهم مايكفيهم من الخير عن قبول مثل هالوظائف ...
اتمنى فهمتي قصدي لاني مو رافضه فكرة الوظيفه لكن ماعجبتني اساليب التوظيف اللي تعرض الان للمراه ولاقبولها لها بدون تردد ..

^

هلا بكِ شادن

حبيبتي المرأه العاقله ماراح تشتغل بوظيفه فيها ذل وهوان لو تموت من الفقر

ولكن تبقى القاعدة اللتي تقول للضروره احكام

حبيبتي انتي اذا لاقيه احد يصرف عليك غيرك مو لاقي

اعرف كثير عايشات بفقر محدق اولياء امورهن مايصرفون عليهن

وتذكري فيه زوجات ازواجهن مدمنين ومايصرفوون

وفيه ازواجهن فقراء ولا يملكون من حطام الدنيا شي ومخلين المسؤوليه عليهن

اذا ولي الأمر ماحس بزوجته او بنته او اخته او امه حتى وش تسوي مالها حل ثاني

بتضطر انها تشتغل اي شغله!!!

حبيبتي صدقيني فيه رجال مايصرفون واذا المرأه اشتغلت اي شغله ياخذ فلوسها

اعرف وحده زوجها متزوج عليها ومايصرف عليها وتصلح حاجات وتبيعها وهو يوصلها للزباين والفلوس بجيبه يحطها

تعرفين فيه رجال نذليين لهالدرجه وخاصه اللي يتعاطون

صدقيني خلف هالابواب والبيوووت اسرااااار وناس محتاجه ولا احد حاس بيهم


اذا ولي الامر ماحس ولا صرف عليها وش تسوي؟؟؟؟؟؟؟؟؟

اكيد بتدور على وظيفه محترمه

واذا مالقت وظيفه محترمه

راح تضطر انها تتوظف اي وظيفه مدام فيه خيار امامها

المفرووض الدوله هي اللي تتصرف وتوفر وظايف محترمه

ولاتجعل الفتيات يبيعن بالمجمعات اللي فيها رجال

اما مجمعات نسائيه بحته يا بلاها

نداء لك يابو متعب

بناتنا بناتك

وهن امانة فى عنقك

وخير ديارنا لا بناءنا وليس للغريب

السلام عليكم ورحمة الله وبركاته

اخوي بست انت طرحت موضوع مهم جدا وهو عن مستقبل الفتاه السعوديه وتريد بذلك النقاش في الموضوع انا رأيت كلام اخواني وردهم لك
صراحه اعجبوني بردهم عليك وانا لا استطيع ان اقول اكثر مما قالوه ولكن ما فهمته في اخر كلامك هو ان توصل ندائك لأبو متعب الله يحفظه فلا احد منا يرضى ان يهان اهل بيته وهو ساكت عن حقهم ولا يدافع عنهم فنحن امة واحده
هذا الوطن هو وطننا ونحن اهله ديننا الاسلام ودليلنا القران و نبينا محمد صلى الله عليه وسلم قال: ((انما بعثت لأتمم مكارم الاخلاق)) فاين هذه الاخلاق في هذا الزمن ؟ واين الكرامه في هذا الوطن ؟ الشيطان يجري في الانسان مجرى الدم وكثير من الناس قد سائت حالتهم والسبب الالتجاء بالناس دون الله عز وجل قد اكون خرجت قليلا عن الموضوع لكن هذا الكلام اهم من النقاش نحتاج الى العوده الصادقه وعبادة الله حق عبادته فلا ملجأ لنا الا لله ولا ناصر لنا الا الله ولا رب لنا الا الله سبحانه وتعالى والا لمذا نسمي انفسنا مسلمين . لا اله الا الله محمد رسول الله. عليكم بالدعاء والالتزام بالصلاة (اسأل الله العظيم رب العرش العظيم ان يهدي جميع المسلمين وان يصلح شأنهم وان يديم الخير على هذا الوطن واسأل الله ان يرزقكم من حيث لا تعلمون واسأل الله التوفيق لي ولجميع المسلمين واخر دعونا ان الحمد لله رب العالمين)

انا اعتذر لو لم يكن الرد المناسب واكرر اعتذاري لو كان هناك خطأ فيما قلته فان اخطأت فمن نفسي والشيطان استغفر العظيم رب العرش العظيم من كل ذنب عظيم
وفي الختام استودعكم الله الذي لا تضيع ودائعه
والسلام عليكم ورحمة الله وبركاته