هذه القصيدة تعبر عن نفسها
ياحروف الشعر هاتي من هجوسي ماتبينـه
وانظمي عذب البيوت اللي لها فالشعر شاني
واكتبيها في سطـور الدفتـر الله لايهينـه
بعدها شكراً ويبقى الدور في نطق اللسانـي
لعتزينا ياقصيدي خصمنـا يقطـر جبينـه
في محيط الشعر ماله لاوجـود ولامكانـي
يوم اواجه خصمنا اللي مادعولـه والدينـه
والله ان ينسى فلان انه ولد ذاك الفلانـي
ماتت عقولن خفيفه عاشت عقولن رزينـه
والخفيفـه للخفايـف والرزينـه للرزانـي
يوم اشوف الشعر مع ناس ٍ تشيله مبتلينه
قلت وقٌف باح شعرك عند حـدك لأتمانـي
يحسبن الشعر مثل الصفر يوجـد فالكبينـه
مادرى انه مايناله غيـر جزليـن المعانـي
ان خذينا ياقصيـدي ماخذينـا الا الثمينـه
وان عطينا والله انـا مانمـد الا الثمانـي
حقنا وافي ولاينقـص ولانرضـى الغبينـه
والله انا مانقـدم عشـر ونـدور ثمانـي
وان غزينا مارجعنا والخوي باقـي رهينـه
لازم انا نكسب الموقف بعد فـك الرهانـي
وان هرجنا يسكت المجلس وتغشاه السكينه
وان سكتنا كل قـول ٍ مانبيلـه ترجمانـي
الهزيلـه مانبيهـا مانقـول الا السميـنـه
والهزيله والضعيفـه ماتقـارن بالسمانـي
وكل رجل ٍ يطلب الله فالزمن ربـي يعينـه
يالله اقبل من عبـادك فالخفـا ولا البيانـي
وسلامة الجميع